Fjölmennt og Múrbrjóturinn
Fjölmennt tók þátt í tveimur verkefnum sem nýverið hlutu Múrbrjótinn, viðurkenningu Landssamtakanna Þroskahjálp og Hvatningaverðlaun ÖBÍ. Múrbrjóturinn er veittur árlega á alþjóðadegi fatlaðra, þann 3. desember, þeim sem Þroskahjálp telur að hafi rutt fötluðu fólki nýjar brautir til jafnréttis eða aukið skilning samfélagsins á stöðu fatlaðs fólks.
Verkefnin sem Fjölmennt tók þátt í eru eftirfarandi:
Sendiherrar samnings Sameinuðu þjóðanna um réttindi fatlaðs fólks
Vorið 2011 var haldið námskeið á vegum Fjölmenntar, símenntunar- og þekkingarmiðstöðvar, þar sem hópur fólks með þroskahömlun kynnti sér samning SÞ um réttindi fatlaðs fólks og vann fræðsluefni til kynningar á samningnum fyrir fólk með þroskahömlun. Hópurinn var tilnefndur af Forseta Íslands sérstakir Sendiherrar samningsins og hefur kynnt fötluðu fólki og öðrum áhugasömum samninginn um allt land.
Með okkar augum
Sumarið 2011 voru sýndir í ríkissjónvarpinu sjónvarpsþættirnir “Með okkar augum”. Í þáttunum eru það einstaklingar með þroskahömlun sem sinna dagskrárgerð auk þess að sjá um upptökur og tæknivinnu. Í þáttunum er fjallað um málefni líðandi stundar út frá þeirra augum.
Þess má geta að umsjónarfólk sjónvarpsþáttarins fékk einnig Hvatningarverðlaun ÖBÍ árið 2011.