Fræðsla og tjáning

Á námskeiðinu fá þátttakendur tækifæri til að fræðast um umheiminn í gegnum áhugaverða og aldursviðeigandi fræðslu. Samhliða er unnið með færni í að velja á milli valkosta og að fikra sig í áttina að tjáningu í gegnum stöfun.

Námskeiðið er ætlað einhverfu fólki sem notar talmál lítið eða ómarkvist til tjáskipta. Nálgunin byggir á virðingu fyrir upplifun þátttakenda, trú á færni (least dangerous assumption) og tekur mið af ólíkri skynjun og skynúrvinnslu. Þetta er gert með skýrum ramma og stuðningi sem eykur öryggi og þátttöku.

Unnið er með stöfun til tjáskipta sem er aðferð sem notuð hefur verið í auknum mæli víða um heim. Veittur er mikill stuðningur í upphafi, en dregið er úr honum eftir því sem færni eykst.  Aðferðin tekur mið af áskorunum tengdum frumkvæði og viljastýrðum hreyfingum (apraxíu) og nýtir sjónrænar og hljóðrænar vísbendingar í kennslu. 

Við notkun fjölbreyttra tjáskiptaleiða er ávallt hætta á ómeðvituðum áhrifum tjáskiptafélagans á tjáningu þátttakans. Því er lögð rík áhersla á leiðsögn, faglega meðvitund og verklag sem stuðlar að því að rödd þátttakandans fái að njóta sín. Unnið er eftir aðstæðubundnu sjálfræði og rétti fatlaðs fólks til tjáningar með þeim stuðningi sem það þarf, í samræmi við samning Sameinuðu þjóðanna um réttindi fatlaðs fólks.

Áhersla er lögð á samstarf við aðstandendur og aðstoðarfólk til að styðja við yfirfærslu í daglegt líf.

Markmið námskeiðsins er að efla lífsgæði, auka þátttöku og styrkja tjáningu þátttakenda.

Námskeiðið er bæði hugsað fyrir þátttakanda og tengla til að þess að læra að skilja/nota aðferðina í daglegu lífi þátttakanda. 

Vakin er athygli á að hægt er fá um fræðslu fyrir starfsfólk og aðstandendur þátttakenda á þessu námskeiði. Sú fræðsla á höndum ráðgjafa Fjölmenntar og skal ákveðin í samstarfi við tengil þátttakenda og þátttakanda sjálfan.